طيف عابر: مين"خَرم" الاوزون ؟! 1 -->

نرحب بانضمامك لمجتمع "طيف عابر" ضع بريدك وسيصلك كل ماهو مفيد لك ولأسرتك إن شاء الله:
ستصلك على الفور رسالة ترحيبية بها رابط الرجاء التكرم بالضغط عليه لتفعيل اشتراكك
طبعاً بفكر ف مين خرم الاوزون

بعد التحية و السلام و الذى منة
رغم حبى للغة الضاد -العربى يعنى- و حتى و كذلك وحيثما و ان لم يكن كذلك كان هكذا و الذى منه ..

فحبيت أعمل مواضيع كدة باللغة بتاعتنا السلسه دى يعنى اللغه اللى بنتكلم فيها مع بعضينا ف الشارع و طبعا ما حدش يقولى لغة شوراع -لحط صباعى ف عنيه- لكن هى ف الحقيقه لغه وسط بين لغة المساطب و لغة الشوارع بس بدون اسفاف -يعنى ايه اسفاف دى OoO-

و بمناسبة يعنى المقدمة الكبيرة دى و كلامنا عن اللغة فطبعا بالصلاة ع النبى كده -صل الله عليه و سلم- زيد لينا النبى صلاة-صل الله عليه و سلم- فيا سيدى احنا اصلا و فى الواقع-حلوة فى واقع دى- لغلتنا عربى

و علشان أصل اللغة رمز فكل واحد عمل ليه رمز اقصد لغة وحدة

و طبعا لاننا شعوب "متحدرة"-متحضرة يعنى- فكل شعب عمل ليه لهجه وحدة و سمها لغة حسب المكان
يعنى تلاقى لغة للخليج و لغة للشاميين و لغة للمغرب العربى و لغه خاصة للمصريين -ودى اللهجه الوحيدة اللى بفمها الكل حتى الاطفال ف الشوارع ف الدول العربيه ×_×-

العجيب ان حتى اللغات دى بتختلف من دولة لدوله و الاعجب انها داخل كل دولة و حسب "المنتِقه" - اصلها منطقة -تلاقى لغة

حصل ف يوم كنت بكلم سعودى و رغم ان كلامة كله سقط منى الا انى كنت ال عامل فاهم يعنى
لحد مجينا للتفنيش -النهاية يعنى- وبيقولى زين؟! اقوله ان شاء الله
يقولى زين؟!! اقوله إن شاء الله

يرجع يقولى زين؟!! أقوله إن شاء الله

-صح صح شطور-

فعلا

رجع تانى قالى زين ؟!:(

قلته زين

قالى طيب السلام عليكم

ف الحقيقه انى كنت فاكر ان زين يترد عليها بان شاء الله وما كنت اعرف ان لازمها زين تانيه زى الهمز فوق الالف ف كلمة أحول *_^

طبعا و الامر اسخن ف الدوله الواحدة

فالصعيدى يعنى يفرق مثلا عن الاسكندارنى عنه عن السناوى عنه عن الكوعاوى-نسبة لكوع القرد يعنى منطقه جنبنا ما تشغلش بالك انت-

ام هند -اصلها المهم-

نرجع لسؤالنا ف الاصل

مين خرم الاوزون؟!

صحصح كدة و ما تنمش دا احنا لسه ف اول الطريق

تشرب شاى؟
احسن برضه دا الشاى مضر للصحة

-شكلك اصلا بتعفر ^_*-
و بمناسبة الناس اللى بتعفر-اللى بتشرب سجاير يعنى -و الضرر و الكلام اللى يوجع الدماغ دا
زمان يعنى كانت السجارة هو طموح مشروع لكل شاب طلع لقى ابوه عمال يكركر بالجوزه -شيشه يعنى- جوة البيت او ع القهوه

فكان الواد يختلس-ايه رأيك عربى اهو ^_^- سجارة كده كل فين و فين يعنى تقدر تقول حب استطلاع-و كأنه هيحارب ال استطلاع ال-

طبعا الواد بيشرب سجاير دلوقتى علشان اصاحبه اللى خايفين عليه قالوله ان حجر الشيشه تقيل ع صدرة -و نعم الاصحاب-

للاسف اللوم هنا ع الاب اللى غرس فى الولد السلوك السئ-شويه عربى فصحه اهو علشان ما تملش صحصح انت بس-
و ذلك بالسلوك السئ اللى اقدم عليه الاب و بالتالى فقد المربى عنصرين هامين هما القدوة الحسنة و كذلك القدرة على التقويم

و طبعاً لأنى غلبان و منعزل من فترة عن الناس-تقدر تقول بيات شتوى ^_*-

فبسأل واحد صاحبى عن واحد صحبى تانى-صحصح كدة وما تهوش معايا- كان بيشرب بعيد عن ولادكم سجاير -بعفر يعنى-و بطل لفتره

ام هند- قلتلك عليها قبل كدة ما تغلبنيش معك بئه ’_’ -

فبسأله عن اخبار صاحبنا دا-بسأل صاحبى عن صاحبى .. شكلك تهت .. ما علينا .. كمل انت بس -

فبيقولى يا عم دلوقتى عقبال املتك بيشرب حشيش :O

قلتله ينهار ابيض يعنى مش بنجو ؟!!

فضحك كده ضحكه صفرة-صفره مش حمرة ما تلخبطناش- و قالى :البنجو دا كيف العيال الصغيرة دلوقتى يا حمادة -بالمناسبة انا بكره اسم حمادة دا جداااا :(-

نسيت اقولكم اماكن التعفير دلوقتى ما بقتش زى زمان ف الحمامات ولا ورا سور المدرسة
لكن بقت عادى كده عينى عينك وف كل مكان و حسبنا الله و نعم الوكيل فيك ياللى كنت بتكركر بجوزتك جوه البيت-قولوا آآآمين-

و بمناسبة المدرسة و الحمامات-افتح الشباك اللى جانبك لو شامم حاجه *_*-

اقولكم قصه طريفه حكاها لى استاذ" شحاته" - دا اسم مش وظيفه يا ذكى:@- مدرس اللغة الانجليزيه بتاعنا

استأذن طالب علشان ينزل الحمام -علشان يعمل زى الناس-

فاذن له

شويه و الواد رجع بيعيط وشكله متبهدل

فقاله المدرس مالك يابنى؟!!

قاله معيش البطاقة

قاله مال البطاقة و اللى عاوز تعملة زي الناس

قاله ما انا قابلت واحد عند الحمامات و قالى كلم شريف باشا و لما رحت اكلمة قالى فين بطاقتك و ما كان معايا فضربونى وقالوالى ما تمشيش من غير بطاقة تانى -ههىهىهىه-

طبعاً الواد هو اللى غلطان
ما كان يعرف ان اللى عاوز يعمل زي الناس لازم يكون معاه بطاقة ×_*

نسيت اعرفكم بشريف باشا

شريف باشا طالب ف المدرسه بس ابوه-الله يرحمه- كان ظابط

و شريف كان عسول و حلوه و مؤدب لكن بئه ما تعرفش ايه حصله ف الثانوى تقريباً فهم يعنى ايه طالب يكون ابوه ظابط ف بلدنا ^_*

نسيت اقولكم ان لو شريف عمل مشكله و ضرب حد هو و صحابه يجى البوكس-سيارة الشرطه- تاخد شريف و صاحبه و ما تفهم من فضلك غلط لا سمح الله

-صح كده يا فاهمنى-

علشان يروحوهم البيت


طبعاً مش كل ولاد الظباط كده -ربنا يجعل كلامنا خفيف عليهم-

و طبعا لان الكلام كله ملخبط فالعنوان مش ليه علاقه بالموضوع ^_^
و مرة جايه ان شاء الله ابئه اقولكم مين خرم الاوزون *_×
لو عدت المرة دى

يبئه اشوفكم قريب إن شاء الله ^_^


13 تعليق على"مين"خَرم" الاوزون ؟! 1"

  • ههههههههههه
    حقيقي احمد من اروع ما قرأت ومتفهمنيش غلط صحصح
    كل كتاباتك حلوة لكن فعلا هاد مميز لانه فيه نقد ساخر بطريقة مميزة واسلوب جديد ما تعودناه منك
    يسلمووووووووووووووووووووووووو ^-^

  • تانى مره احاول اجى اعلق عندك .. اصل انت عامل التعليق بطريقه تحط لينك وحاجات كدا ومش راضيه تفتح معايا خالص .. ودى تانى محاوله وربنا يسهل

  • يا سلام .. نجحت .. نجحت .. اصل اول امبارح كنت فاشل خالص فى التعليق وكان الكمبيوتر حاطط لى كلمة Loodingوكل ما اكتب لودنج ما ياخدش التعليق .. سلام بقى .. اصل كنت زعلان خالص انى مش عارف اعلق وانت تلاقيك كنت فاكرنى مطنش .. اصل يا احمد انا ما بعرفش كويس فى الكمبيوتر يا دوب كلك عللى اللينك واروح واكتب الكلمتين وارجع .. لكن لو لقيت حاجات فنيه افشكل وما اعرفش اعمل حاجه واخر لخمه

  • نكلم بقى فى البوست .. بيجينى واحد من المغرب اسمه اسافو انوروزوا وبيتكلم معايا باللغه العاميه المصريه زى اللبلب وانا كمان بكلمه حتى على الايميل
    وكل العرب بيعرفوا العاميه المصريه .. اصل يا احمد احنا الاصل .. العرب كلهم شربوا الثقافه المصريه من اول القرن الماضى بداية ظهور وسائل الاعلام وكان اولها الصحافه .. ولما ظهرت الاذاعه المصريه فى الثلاثينات والعرب ما كانوش بيسمعوا غيرها وابتدت السينما المصريه تغزوا العرب وكمان التليفزيون المصرى اول تليفزيون عربى .. وهكذا دواليك .. لكن اللى حصل لمصر الآن لا يسر عدوا ولا حبيب واصبحت مصر متفلشكله على الاخر ..
    فشكلتك جميله وعايز تنافس فشكول .. طب لما نشوف
    تحياتى

  • ياااا ياااا يااااااااا سلام سيد fashkool عندنا ياااا يااا يااااا اهلا و سهلاً لو فضلت ارحب بحضرتك من هنا لحد القاهره-تجى ساعه كده ^_^- مش هوفى حضرتك طبعاً

    لكن دعنى ف البدايه اعتذر لحضرتك و اشكرك ف نفس الوقت

    اعتذر للصعوبه اللى وجدتها ف كتابته التعليق و ان شاء الله بشوف طريقه اسهل

    تانى شئ اشكرك لوجود حضرتك فعلا ف مدونتى المتواضعه و شرف لى تلبيتك لدعوتى اسأل الله ان يديم تواجدكم

    بخصوص مداخلة حضرتك

    فانا اتفق معك تماما و اتصور فعلا ان الغزو الثقافى المصرى ف الماضى كان ليه فضل كبير جداا لانتشار العاميه المصريه حتى قيل ان الاطفال ف شوراع و حوار الكل الدول العربيه تعرف العاميه المصريه عن ظهر قلب-مجازاً-

    ف حين الان تراجع الدور الثقافى المصرى ف مقابل تصاعد تيارات ثقافيه آخرى ع حسابه و ذلك لانتشار الفضاحيات و اعتماد الجزء الاكبر من الاعلام ع ثقافه "الاثارة" يعنى ثقافات اكثر تحرراً من كل شئ حتى "الملابس"


    و دا للاسف واقع لا يمكنا ابدا انكاره


    هناك شئ مهم الاشاره ليه ايضا تناولته بشئ من السخريه ف المدونه و هى التربيه

    التى اصبحت فعلا تعانى من ازمه حقيقه و كنت اتمنى انى اسمع رأي حضرتك بهذا الشأن

    ع كلا وجودكم اثرا بالايجاب على كثيرا و اسأل الله ان يبارك لنا و لكم ف اعمارنا و ازاقنا

    دمتم كما تودون دوماً^_^

  • يا جماعه واحده واحده ...
    بلاش لخبطه ...مين الي خرم ودن الناقه ...الأذون دي ودن الناقه...وخرموها ليه مش كان كفايه التعريفه مخرومه؟ والربع جنيه .
    لو حاولنا نفهم كل حاجه مش رايحين نفهم ولا حاجه هوانت عايز تقول ايه ؟نتفق علي ايه ؟
    والله انا شايف ان ...لا اله الا الله محمد رسول الله ...كفايه قوي هي الي بتجمعنا بس خلاص..

  • ياااااااا اهلا يااااااا اهلا يا اهلا بالمحارب فركشاوى .. ناوى

    معك بان لا اله الا الله محمد رسول الله تكفي لتجمعنا و للعلم لن يجتمع العرب الا ع الدين كما جمعهم الله اول مرة فاضحوا من رعاة للغنم الى سادة للامم ..

    لكن لا اله الا الله قول و تصديق و عمل لا ينفك بعضهما عن بعض
    قول باللسان و تصديق بالقلب و عمل الجوارع و الانام ..



    ربنا رزقنا العلم و العمل الصالح

    اشكرك كثيراااااااا ^_^

  • موضوع مميز اخى واحلى ما فيه فكرتو والدرس منو عن التربيه وكلشى تعويد
    بارك الله فيك

  • هو مين اللى خرم الأوزون ياجماعة..............
    أنا حاسسس انى تهت
    بس كلامك صح ياعمر
    خصوصاً ان فترة الظابط دى انا عشتها فى المدرسة

  • ساندرا اللى هى هى غير معرف باين من كلامك يعنى اللى بيشع ذكاء *_^


    أهلا بك و مرحباً و سعداء جداا لانضمامك و لو ع استحياء الى عالم المدونين ^_^

    دمتم بسعادة

  • العوامى :

    ياااااااااااااا ميت أهلا و سهلا و مرحباً و كل شئ جميل لقدومك يا عوامى


    ليس غريب عليكم تواجدكم لكن لا اخفيك فانها مفجأه سااااااااااااااااااااااااااره جدااا



    ---
    بخصوص مداخلتك :
    انا برضه لفتره ما كنت فاهم ^_^ لكن الحمد لله لما ركزت فهمت ..

    الحكايه

    الحلقه دى بتكلم عن التربيه عن طريق اثاره نقطتين الاولى بتاعت مدخنى السجائر و الثانيه ف حال وجود سلطه لدى الاب مثلاً

    طبعا انا لا اقصد شريف بعينه و لا ضابط بعينه لكن القصد هو ضرب مثل ليكون اقرب لعقل و وعى القارئ الكريم ..


    عوامى


    سعيد جداااا لتواجدك و اسأل الله ان يديم تواجدك عندنا ^^

  • مقال جميل جدا يا أحمد وفعلا زي ما انت بتقول

    لكن الأعجب بئى انك تشوفه من بنات

    يعني عندك مثلا كنت ساكن في سكن طلبة الإسماعيلية في القاهرة

    وجنبنا مدرسة بنات صنايع

    فالمهم انا طالع لواحد صاحبي في الدور الاخير عشان نذاكر مع بعض " مش تفهم غلط بنحكي مع بعض "

    المهم قالي تعالى بص

    روحت ابص

    لقيت اننا كاشفين مدرسة البنات خالص

    وجنب الحمامات لقيت حبة بنات قاعدين بيشربوا

    انا بصراحه ازبهليت " من الإزبهلال يعني "

    ده غير المناظر التانيه اللي شوفتها كفايه ديه

    وهي لو جت على الشرب يبئى كويس

    انما ان الدنيا تتعكس كلها

    فالبنات يشربوا سجاير ويحششوا واللذي منه

    والبنات ينزلوا الشغل

    والبنات يبئى بايدهم القوامة

    والبنات كمان بيعاكسوا الوقتي

    وده حصل معايا فعلا

    في رمضان اللي قبل قبل اللي فات

    في الفترة مابين التراويح لحد التهجد

    كنت طالع انا وواحد صاحبي من الجامع الساعه 12 وشويه كده نجيب السحور

    المهم واحنا راجعيين بنرجع من وسط جنينة اسمها ميدان شمبليون

    فالمهم انا سمعت ورايا بس بس بس فانا قولت واحد صاحبنا طلع ورانا عاوز حاجه

    فببص لقيت تلات بنات هما اللي بيبسبسوا

    انا اللي جالي قعدت اضحك من المفاجأة

    وصاحبي فضل مبرق كده ليهم مزبهل خالص

    وانا ابص عليه ومش قادر ابطل ضحك

    فاحنا بقينا يا سي احمد في زمان معكوس

    يعني اللي خلى الراجل بتاع امريكا يخلف ويرضع

    شويه شويه هيجلنا

    وتلاقي الراجل قاعد في البيت بيطبخ ويرضع العيال ومراته اللي نازله الشغل

    وهتلاقي برضوا الولاد هما اللي هيتخطبوا من بيوتهم

    لكن تفتكر ساعتها الشبكه على مين ؟؟؟؟

  • هارى بوتر :

    يا مرحب يا مرحب :-)


    نورت المدونه بمداخلتك و عندك حق فنحن الان ع ما يبدو نعانى من ازمة أخلاقية شديدة انقلبت فيها الموازين و ضاعت فيها القيم او كادت تندثر>_< ..

    اشكرك أحمد لوقوفك و جزاكم الله خيرا :-)

إرسال تعليق

( مَا يَلْفِظُ مِن قَوْلٍ إِلا لَدَيْهِ رَقِيبٌ عَتِيدٌ )

عزيزى الزائر .. أن لم يكن لديك الوقت الكافى لتسجيل الدخول أو لم يكن لديك حساباً فى blogger فيمكنك ببساطه التعليق عبر أستخدام خاصيه (مجهول) أو ( الاسم \ العنوان ) من القائمه المنسدله أسفل مربع التعليق .. علماً بننا يمهمنا كثيراً سماع رأيك مقدرين كثيراً وقتك الذى منحتنا اياه لقرائتك سطورنا :)